പേരാമ്പ്രയിൽ യുവതിക്ക് നേരേ ആസിഡ് ആക്രമണം. പൂനത്ത് കാലടി പറമ്പിൽ പ്രബിഷ (29)യെ ആണ് മുൻ ഭർത്താവ് പ്രശാന്ത് ആക്രമിച്ചത്. മുഖത്തും നെഞ്ചത്തും ശരീരത്തിന്റെ പിന്നിലും ഗുരുതരമായി പൊള്ളലേറ്റ പ്രബിഷ കോഴിക്കോട് മെഡിക്കൽ കോളജ് ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്. കഴിഞ്ഞ മൂന്നു വർഷമായി പ്രബിഷയും പ്രശാന്തും പിരിഞ്ഞ് കഴിയുകയായിരുന്നു.
ചെറുവണ്ണൂർ ഗവ.ആയുർവേദ ആശുപത്രിയിൽ ചികിത്സയ്ക്കെത്തിയപ്പോഴാണ് പ്രബിഷക്ക് നേരേ ആസിഡ് ആക്രമണം ഉണ്ടായത്. പുറം വേദനയെ തുടർന്ന് കഴിഞ്ഞ 18 മുതൽ പ്രബിഷ ചികിത്സയിലായിരുന്നു. ഇന്നു രാവിലെ 9.30ന് ആശുപത്രിയിലെത്തിയ പ്രതി പ്രബിഷയുമായി സംസാരിക്കുന്നതിനിടെ മുഖത്ത് ആസിഡ് ഒഴിക്കുകയായിരുന്നു. മുഖത്തും നെഞ്ചത്തും പൊള്ളലേറ്റ് തിരിഞ്ഞോടിയ പ്രബിഷയുടെ പിന്നിലേക്കും ആസിഡ് ഒഴിച്ചു.
ഓടിക്കൂടിയ ആശുപത്രി ജീവനക്കാരും നാട്ടുകാരും ചേർന്ന് യുവതിയെ പേരാമ്പ്ര ഗവ. താലൂക്ക് ആശുപത്രിയിലും തുടർന്ന് കോഴിക്കോട് മെഡിക്കൽ കോളജ് ആശുപത്രിയിലേക്കും മാറ്റി. പ്രതി പ്രശാന്ത് മേപ്പയ്യൂർ പൊലീസിൽ കീഴടങ്ങി.
